ଓଡ଼ିଶା ସମାଚାର

ଧାନର ସହାୟକ ମୂଲ୍ୟ ଦାବିରେ ବ୍ରହ୍ମଗିରିରେ ବିଶାଳ ଚାଷୀ ସମାବେଶ

ଧାନର ସହାୟକ ମୂଲ୍ୟ ଦାବିରେ ବ୍ରହ୍ମଗିରିରେ ବିଶାଳ ଚାଷୀ ସମାବେଶ

ଧାନର ସହାୟକ ମୂଲ୍ୟ ଦାବିରେ ବ୍ରହ୍ମଗିରିରେ ବିଶାଳ ଚାଷୀ ସମାବେଶ
July 16
09:58 2017

ଭୁବନେଶ୍ୱର, ୧୬/୦୭/୨୦୧୭(ଓଡ଼ିଶା ସମାଚାର)- ବ୍ରହ୍ମଗିରି ବିଜୁ ଜନତା ଦଳ ପକ୍ଷରୁ ଚାଷୀଙ୍କୁ ଧାନର ଉଚିତ୍‍ ସହାୟକ ମୂଲ୍ୟ ଦାବିରେ ବିଶାଳ ଚାଷୀ ସମାବେଶ ଅନୁଷ୍ଠିତ ହୋଇଯାଇଛି । ପୂର୍ବତନ ଖାଦ୍ୟ ଯୋଗାଣ ମନ୍ତ୍ରୀ ତଥା ବ୍ରହ୍ମଗିରିର ବିଧାୟକ ସଂଜୟ କୁମାର ଦାସବର୍ମା ନିଜ ନିର୍ବାଚନ ମଣ୍ଡଳୀରେ କର୍ମୀମାନଙ୍କୁ ନେଇ ଏକ ବିଶାଳ ଶୋଭାଯାତ୍ରାରେ ଢାବା ଛକଠାରୁ ବାହାରି ବ୍ରହ୍ମଗିରି ବଜାର ଦେଇ ପୁରୀ-ସାତପଡ଼ା ରାଜପଥର ୨କିମି ରାସ୍ତା ଅତିକ୍ରମ କରି ବ୍ଲକ ସମ୍ମୁଖରେ ପହଂଚିଥିଲେ । ବ୍ରହ୍ମଗିରି ବଜାର ଦେଇ ରାଜପଥରେ ଏହି ଶୋଭାଯାତ୍ରା ଯାଉଥିବା ବେଳେ କେନ୍ଦ୍ର ବିରୋଧୀ ସ୍ଲୋଗାନ ଦିଆଯାଇଥିଲା । “ନରେନ୍ଦ୍ର ମୋଦି ହାଏ, ହାଏ, ଧାନର ସହାୟକ ମୂଲ୍ୟ ଆମର ଦାବି, ଛତିଶଗଡକୁ ସାହାଯ୍ୟ କରି ଓଡ଼ିଶାକୁ ମାରୁଛ କାହିଁ, ଚାଷୀଙ୍କ ପଇସାରେ ବିଦେଶ ବୁଲିବା ବନ୍ଦ କର” ଆଦି ସ୍ଲୋଗାନମାନ ଦେଇଥିଲେ । ବ୍ଲକ ସମ୍ମୁଖରେ ଶୋଭାଯାତ୍ରା ପହଂଚିବା ପରେ ବିଜୁ ଜନତା ଦଳ ସଭାପତି ବିଦ୍ୟାଧର ସ୍ୱାଇଁଙ୍କ ସଭାପତିତ୍ୱରେ ବିକ୍ଷୋଭ ସଭାରେ ଯୋଗଦେଇ ଶ୍ରୀ ଦାସବର୍ମା କହିଥିଲେ ଯେ ବ୍ରହ୍ମଗିରି ଅଂଚଳରେ ୭୫ଭାଗ ଲୋକ ଧାନ ଚାଷ ଉପରେ ନିଜର ପରିବାର ପୋଷଣ ନିମନ୍ତେ ନିର୍ଭର କରନ୍ତି । ରାଜ୍ୟ ସରକାର ଜଳସେଚନ ଓ ଜଳ ନିଷ୍କାସନ ପାଇଁ ୨୦୦ କୋଟି ଟଙ୍କା ଖର୍ଚ୍ଚ କରି ବ୍ରହ୍ମଗିରି ଚାଷୀଙ୍କ ସମସ୍ୟା ସମାଧାନ କରିପାରିଛନ୍ତି । ବ୍ରହ୍ମଗିରିର ବେଣାକାଣିଆ, ବର୍ଷିକାଣିଆ, ଏକନାଳିଆ, ଚଉଦଶପୁଆଣି, ଚଉଦମୌଜା ଓ ସୁନାମୁଖି କେନାଲ ଗୁଡିକର ସଂସ୍କାର ଫଳରେ ଆଜି ବ୍ରହ୍ମଗିରିର ଚାଷୀଙ୍କର ଉପôାଦନ ବଢ଼ିଛି । ଏକମାତ୍ର ଧାନ ଫସଲକୁ ନିର୍ଭର କରୁଥିବା ଚାଷୀକୁଳ ସର୍ବନିମ୍ନ ସହାୟକ ମୂଲ୍ୟ ଦାବିରେ ହଜାର ହଜାର ସଂଖ୍ୟାରେ ବ୍ରହ୍ମଗିରି ବ୍ଲକ ଘେରାଉ କରିଥିଲେ ।
କୃଷି ଓ କୃଷକର ସର୍ବାଙ୍ଗୀନ ଉନ୍ନତିରେ ହିଁ ରାଜ୍ୟର ଉନ୍ନତି- ଏହି ଭାବଧାରାକୁ ଆଧାର କରି ବିଜୁ ଜନତା ଦଳର ସରକାର କୃଷି ଓ ଆନୁଷଙ୍ଗିକ କ୍ଷେତ୍ରର ବିକାଶକୁ ପ୍ରଗତି ପ୍ରକ୍ରିୟାରେ ପ୍ରାଥମିକତା ଦେଇ ଆସୁଛନ୍ତି । କୃଷି ଓ କୃଷକଙ୍କୁ ସମର୍ଥ ଓ ସଶକ୍ତ କରିବା ଲକ୍ଷ୍ୟରେ ବିଭାଗର ନାମ ପରିବର୍ତନ କରାଯାଇ ‘କୃଷି ଓ କୃଷକ ସଶକ୍ତିକରଣ’ ବିଭାଗ କରାଯାଇଛି । ସ୍ୱତନ୍ତ୍ର କୃଷି ବଜେଟ୍ ଏବଂ ‘କୃଷି କ୍ୟାବିନେଟ୍’ ଗଠନ କରିବାରେ ଓଡ଼ିଶା ଦେଶର ଅଗ୍ରଣୀ ରାଜ୍ୟ ଓ ଏହା ମାଧ୍ୟମରେ ରାଜ୍ୟ ସରକାରଙ୍କ ଅଙ୍ଗୀକାର ପ୍ରତିଫଳିତ । କୃଷିର ଉନ୍ନତି, କୃଷକଙ୍କ ସଶକ୍ତିକରଣ ଓ କୃଷକମାନଙ୍କ ସାମାଜିକ ନିରାପତାକୁ ଆହୁରି ସୁଦୃଢ଼ କରିବା ପାଇଁ ରାଜ୍ୟ ସରକାର ବହୁବିଧ ଉପାୟ, କୌଶଳ କାର୍ଯ୍ୟକ୍ରମ ଓ ଯୋଜନା କାର୍ଯ୍ୟକାରୀ କରିଛନ୍ତି, ଯାହା କୃଷି କ୍ଷେତ୍ରରେ ଏକ ସକାରାତ୍ମକ ବୈପ୍ଳବିକ ପରିବର୍ତନ ଆଣିବାରେ ସହାୟକ ହୋଇଛି । ୨୦୧୩-୧୪ରେ ୭୧୬୨ କୋଟି ଟଙ୍କାର କୃଷି ବଜେଟ ଚଳିତବର୍ଷ ୨ଗୁଣ ବୃଦ୍ଧି ପାଇ ୧୪,୯୩୦ କୋଟି ଟଙ୍କାରେ ପହଂଚିଛି । ୨୦୦୦ ମସିହା ତୁଳନାରେ ଆମ କୃଷି ଉପôାଦନ ବଢ଼ିଛି ଦୁଇଗୁଣ । ସେହିପରି ୨୦୧୦ ମସିହା ତୁଳନାରେ ଆମ କୃଷକଙ୍କ ଆୟକୁ ଦୁଇଗୁଣ କରାଇବାରେ ଓଡ଼ିଶା ସାରା ଭାରତରେ ପ୍ରଥମ ରାଜ୍ୟ । ଗତ ୫ବର୍ଷରେ ୪ଥର କୃଷି କର୍ମଣ ପୁରସ୍କାର ପାଇ ଓଡ଼ିଶା କୃଷି କ୍ଷେତ୍ରରେ ଅନ୍ୟ ରାଜ୍ୟମାନଙ୍କ ପାଇଁ ଉଦାହରଣ ହୋଇପାରିଛି । ଏହିସବୁ ସଫଳତା ପଛରେ ରହିଛି ରାଜ୍ୟ ସରକାରଙ୍କ କୃଷିର ବିକାଶ ପାଇଁ ପ୍ରତିବଦ୍ଧତା ଓ ଓଡ଼ିଶାର କୃଷକମାନଙ୍କ ପରିଶ୍ରମ । ନିୟମିତ ବ୍ୟବଧାନରେ ଓଡ଼ିଶାର କୃଷକମାନେ ସାମ୍ନା କରୁଛନ୍ତି ବନ୍ୟା, ମରୁଡ଼ି ଓ ବାତ୍ୟା ଭଳି ପ୍ରାକୃତିକ ଦୁର୍ବିପାକ । ତଥାପି ସେମାନେ ଯେଭଳି ସାହସ, ଶକ୍ତି ଓ ସାମର୍ଥ୍ୟର ପରିଚୟ ଦେଇଛନ୍ତି, ସେଥିପାଇଁ ସେମାନେ ଅଭିନନ୍ଦନୀୟ । ବିଜୁ ଜନତା ଦଳର ସଭାପତି ତଥା ରାଜ୍ୟର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକ ଏକଥା ସବୁବେଳେ କହିଆସିଛନ୍ତି ଯେ “ମୋ ସରକାର କୃଷକମାନଙ୍କର ।” ସରକାରଙ୍କର ସମସ୍ତ କାର୍ଯ୍ୟକ୍ରମ ଯେଭଳି କୃଷକମାନଙ୍କ ଉନ୍ନତି କଳ୍ପେ ଅଭିପ୍ରେତ ହୁଏ, ସେଥିପାଇଁ ସେ ସବୁବେଳେ ସ୍ୱତନ୍ତ୍ର ଧ୍ୟାନ ଦେଇ ଆସିଛନ୍ତି ।
ରାଜ୍ୟ ସରକାରଙ୍କ ଅନେକ ପ୍ରଗତିଶୀଳ ପଦକ୍ଷେପ ଓ ସମୟ ଉପଯୋଗୀ କାର୍ଯ୍ୟକ୍ରମ କୃଷି କ୍ଷେତ୍ରକୁ ଦେଇଛି ନୂତନ ସାମର୍ଥ୍ୟ । ଏବେ କୃଷକମାନଙ୍କୁ ୧% ସୁଧରେ କୃଷି ଋଣ ଯୋଗାଇ ଦିଆଯାଉଛି । ‘ବିଜୁ କୃଷକ କଲ୍ୟାଣ’ ଯୋଜନାରେ ୫୮ ଲକ୍ଷରୁ ଊଦ୍ଧ୍ୱର୍ କୃଷକ ପରିବାରଙ୍କ ସାମାଜିକ ସୁରକ୍ଷାକୁ ସୁନିଶ୍ଚିତ କରାଯାଇଛି ଓ ୧୦୦ଟି ହସ୍ପିଟାଲ ଜରିଆରେ ବିନା ମୂଲ୍ୟରେ ସ୍ୱାସ୍ଥ୍ୟ ଚିକିତ୍ସା ସୁବିଧାର ବ୍ୟବସ୍ଥା କରାଯାଇଛି । କୃଷି ସହିତ ଯୋଡ଼ି ହୋଇ ରହିଛି ଜଳସେଚନ ସୁବିଧା । ୨୦୧୯ ସୁଦ୍ଧା ୧୦ଲକ୍ଷରୁ ଅଧିକ ହେକ୍ଟର ଚାଷଜମିକୁ ଜଳସେଚନ ସୁବିଧା ଯୋଗାଇ ଦେବାର ପ୍ରତିଶ୍ରୁତି ପୂରଣ ଦିଗରେ ଉଲ୍ଳେଖନୀୟ ଅଗ୍ରଗତି ହୋଇଛି । କଳାହାଣ୍ଡି ଓ ବଲାଙ୍ଗୀର ଜିଲ୍ଳାରେ ମେଗା ଉଠା ଜଳସେଚନ ପ୍ରକଳ୍ପ କାର୍ଯ୍ୟକ୍ଷମ ହେବା ଫଳରେ ଉଭୟ ଜିଲ୍ଲାର ଚାଷୀମାନଙ୍କ ପାଇଁ ନୂତନ ଆଶାର ସଂଚାର ସୃଷ୍ଟି ହୋଇଛି । ଚଳିତ ବର୍ଷର ବଜେଟ୍‍ରେ ‘ପାର୍ବତୀ ଗିରି ଉଠା ଜଳସେଚନ’ ଯୋଜନାରେ ୧୫୪୬ କୋଟି ଟଙ୍କାର ବ୍ୟବସ୍ଥା ହେବା ସହ ଜଳସେଚନ ଓ ବନ୍ୟା ନିୟନ୍ତ୍ରଣ ପାଇଁ ୯୨୦୦ କୋଟି ଟଙ୍କାର ରେକର୍ଡ ବ୍ୟୟବରାଦ କରାଯାାଇଛି । ମୁଖ୍ୟମନ୍ତ୍ରୀ ଆଡିବନ୍ଧ ଯୋଜନା (ମାଟି)ରେ ୪୦୦୦ ଚେକ୍‍ ଡ୍ୟାମ ନିର୍ମାଣ ପାଇଁ ୫୫୬ କୋଟି ଟଙ୍କା ବିନିଯୋଗ ହୋଇଛି । ‘ବିଜୁ କୃଷକ ବିକାଶ ଯୋଜନା’ରେ ୫ବର୍ଷରେ ୫ଲକ୍ଷ ଗଭୀର ସେଚ କୂପ ଖୋଳିବା ଲକ୍ଷ୍ୟରେ ଚଳିବର୍ଷ ୬୨୦ କୋଟି ଟଙ୍କାର ବ୍ୟବସ୍ଥା ହୋଇଛି । କୃଷି ଓ ମାଛ ଚାଷ ନିମନ୍ତେ ସ୍ୱତନ୍ତ୍ର ଫିଡର ମାଛ ଚାଷ ଓ ଗୋପାଳନ ନିମନ୍ତେ ସର୍ବାଧିକ ରିହାତି, ସାର ଓ ବିହନ ଯୋଗାଣ ପାଇଁ ୧୦୦ କୋଟି ଟଙ୍କାର କର୍ପସ ପାଣ୍ଠି, ମହିଳା ଚାଷୀଙ୍କୁ ୪୦ ହଜାର ମୋବାଇଲ ଫୋନ ଯୋଗାଣ ଜରିଆରେ କୃଷି ସୂଚନା ପ୍ରଦାନ ଆଦି ଅନେକ ଅଭିନବ ଓ ଦୂରଦୃଷ୍ଟିସଂପନ୍ନ କାର୍ଯ୍ୟକ୍ରମ ଜରିଆରେ କୃଷି କ୍ଷେତ୍ରରେ ପରିବର୍ତିତ ସମୟର ଆହ୍ୱାନ ଓ ଆବଶ୍ୟକତାକୁ ପରିପୂରଣ କରାଯାଇପାରିଛି, ଯାହାର ସୁପ୍ରଭାବ ପରିଲକ୍ଷିତ ହୋଇଛି ।
ଓଡିଶା ବିଧାନସଭାରେ ବିଜେପି, ବିଜେଡି, କଂଗ୍ରେସ ଓ କମୁ୍ୟନିଷ୍ଟ ଦଳ ମିଶି ଚାଷିଙ୍କ ପାଇଁ ଧାନ କ୍ୱିନ୍ଟାଲ ପିଛା ସର୍ବନିମ୍ନ ସହାୟକ ମୂଲ୍ୟ ୨୯୩୦ ଟଙ୍କା ରଖିବାକୁ ସର୍ବସମ୍ମତିକ୍ରମେ ପ୍ରସ୍ତାବ ପାରିତ କରି କେନ୍ଦ୍ର ସରକାରଙ୍କ ନିକଟକୁ ପଠାଇଥିଲେ । ପାରତି ପ୍ରସ୍ତାବକୁ ତୁରନ୍ତ କେନ୍ଦ୍ର ସରକାର ଓଡ଼ିଶାର ଚାଷୀକୁଳର ସ୍ୱାର୍ଥ ପାଇଁ ଘୋଷଣା କରିବା ପାଇଁ ଶ୍ରୀ ଦାସବର୍ମା ଦାବି କରିଥିଲେ । ମହାନଦୀର ସୁରକ୍ଷା ଓ ବ୍ରହ୍ମଗିରିର ଚାଷୀକୁଳକୁ ସର୍ବନିମ୍ନ ସହାୟକ ମୂଲ୍ୟ ଦାବିରେ ଏ ଆନ୍ଦୋଳନକୁ ଆଗାମୀ ଦିନରେ ଆହୁରି ତୀବ୍ରତର କରାଯିବ । ଏହି ଶୋଭାଯାତ୍ରା ଓ ବିକ୍ଷୋଭରେ ବ୍ରହ୍ମଗିରି ପଂଚାୟତ ସମିତି ଅଧକ୍ଷା ନଳିନୀ ପ୍ରଭା ବରାଳ, ଜିଲ୍ଲା ପରିଷଦ ସଭ୍ୟ କୈଳାଶ ପରିଡା, ଜିଲ୍ଲା ପରିଷଦ ହରେକୃଷ୍ଣ ମଲ୍ଲିକ, ସୁରେନ୍ଦ୍ର ରାଉତ, ଭାସ୍କର ନାୟକ, ପ୍ରସନ୍ନ ବରାଳ, ରାଜ୍ୟ ପରିଷଦ ସଭ୍ୟ ବିରଂଚି ନାରାୟଣ ଦାସ ପ୍ରମୁଖଙ୍କ ନେତୃତ୍ୱରେ ୨ ହଜାରରୁ ଊଦ୍ଧ୍ୱର୍ ଚାଷୀ, ଦଳୀୟ କର୍ମୀ ଓ ନିର୍ବାଚିତ ପଂଚାୟତ ପ୍ରତିନିଧିମାନେ ଯୋଗଦେଇଥିଲେ । ସଭା ଶେଷ ପରେ ଚାଷୀ ମାନଙ୍କୁ ସେମାନଙ୍କର ନ୍ୟାଯ୍ୟଦାବି ଓ ମହାନଦୀରୁ ଡ୍ୟାମ ହଟାଇବା ପାଇଁ ରାଷ୍ଟ୍ରପତିଙ୍କ ଉଦ୍ଧେଶ୍ୟରେ ବ୍ରହ୍ମଗିରି ବିଜେଡି ପକ୍ଷରୁ ଏକ ସ୍ମାରକପତ୍ର ବ୍ରହ୍ମଗିରି ବିଡିଓଙ୍କୁ ପ୍ରଦାନ କରାଯାଇଥିଲା । ଓଡ଼ିଶା ସମାଚାର

About Author

admin

admin

Related Articles

0 Comments

No Comments Yet!

There are no comments at the moment, do you want to add one?

Write a comment

Write a Comment

13 + 13 =